Ձեր վստահելի աղբյուրը

«Որոշ կուսակցություններ ուղղակի առիթը բաց չեն թողնում հայտարարելու, թե լավ գիտեն, թե ինչ է ներկուսակցական ժողովրդավարությունը: Բայց, իրականում, ես խորհուրդ կտայի նրանց տարբեր ամբիոններից ներկուսակցական ժողովրդավարության մասին հայտարարելուց առաջ մի փոքր մտածել»,- Panorama.am-ի հետ զրույցում, մեկնաբանելով Հայաստանի քաղաքագետների միությունում այսօր տեղի ունեցած քննարկման զարգացումները, ասաց ԲՀԿ խմբակցության անդամ, կուսակցության քարոզչության պատասխանատու Նաիրա Զոհրաբյանը:

Հիշեցնենք, ՀՔՄ-ում մի շարք քաղաքական ուժեր այսօր ընդունել են համաձայնագիր` միջկուսակցական միասնական ընտրական շտաբի գործառույթների մասին: Նախորդ նիստի ժամանակ այն լքեց ՀՀԿ փոխնախագահ Գալուստ Սահակյանը` նախաձեռնությունը որակելով «ռոմանտիկ»: Այսօր էլ նմանատիպ վարքագիծ դրսևորեց «Ժառանգության» փոխնախագահ Ռուբեն Հակոբյանը` պայման դնելով, թե համաձայնագրին մասնակից չորս կուսակցությունները առաջին դեմքերի մակարդակով պետք է ստորագրեն այդ փաստաթղթի տակ (հատկապես շեշտելով Գ. Ծառուկյանի ստորագրության անհրաժեշտությունը, քանզի վերջինիս ստորագրությունը առկա է նաև կոալիցիոն հռչակագրում), այլապես «Ժառանգությունը» կքննարկի շտաբից ընդհանրապես դուրս գալու հարցը:

Նշենք, որ այդ պայման-առաջարկին համաձայնություն են հայտնել ՀԱԿ-ն ու ՀՅԴ-ն, իսկ ահա ԲՀԿ-ն ներկայացնող Վարդան Օսկանյանը տեղեկացրել է, որ իր ներկայացրած կուսակցության առաջնորդ Գագիկ Ծառուկյանի հետ այդ հարցը չի քննարկել:

«Եթե պարոն Օսկանյանը միացել է այդ նախաձեռնությանն ու ստորագրել այն, նշանակում է, որ դա եղել է Գագիկ Ծառուկյանի իմացությամբ ու լիազորությամբ,  քանի որ այլ կերպ մեր կուսակցությունում չի կարող լինել. ընդունված չէ»,- շեշտեց տիկին Զոհրաբյանը:

Նա նաև եզրակացրեց, որ գուցե Ռ.Հակոբյանի հեռանալն ու նման պայման դնելը, ուղղակի պատրվակ է ձեռք բերված պայմանավորվածությունից խույս տալու.

«Իսկ եթե դա այդպես է, ապա պետք չէ անհասկանալի կեցվածք ընդունել ու անհասկանալի պատճառաբանություններ առաջ քաշել, քանզի բոլորիս համար էլ պարզ ու հասկանալի է նման պահվածքի իրական մոտիվացիան: Ավելին` գաղտնիք չի նաև այն, թե որտեղից են, իրականում, իջեցվում «Բարգավաճ Հայաստանի» դեմ ելույթներ ունենալու պետական պատվերները»,- հավելեց մեր զրուցակիցը:

Ն. Զոհրաբյանը ևս մեկ անգամ կրկնեց. եթե կան կուսակցություններ, որոնցում վավեր համարվում է միայն կուսակցության նախագահի խոսքը ու նրա ստորագությունը, ապա ճիշտ կլինի, որ նման ուժերը ներկուսակցական ժողովրդավարության մասին քիչ խոսեն: 

Նախորդող հրապարակում` «Ժառանգության» առաջարկն ընդունվեց ԲՀԿ-ի խմբագրությամբ` առանց «Ժառանգության» ներկայացուցչի